Posicionament des grops d’Unitat d’Aran – PSC e deth Partit Renovador d’Arties e Garòs, respècte des punts 5,6 e 7 der ordre deth dia dera session ordinària deth Conselh de Direccion deth Servici Aranés dera Salut sus era creacion d’ua naua societat mercantil, de gestion adscrita ath SAS e des sòns estatuts:
Liejuda era prepausa de creacion d’una naua societat mercantila tara gestion dera prestacion sanitària en Aran, atau com era conseqüenta restructuracion deth SAS, considèren qu’era artenhuda des modificacions prepausades supausen un cambi fòrça important, tant ena prestacion de servicis, com ena naua estructura dera sanitat aranesa. Se ben, era memòria de gestion e er acòrd corresponent ara creacion dera naua societat mercantil son arraïtzadi damb es principis d’autonomia e autogestion, damb es quaus manifestam eth nòste acòrd, mos semble absolutament insuficients era informacion e estudis presentadi que avalen es decisions qu’ara se sotmeten a votacion. Entenem qu’era gestion sanitària, se ben a ua importanta vertut en estèr gestionada des dera proximitat, tanben ei fòrça important era interconnexion des servicis sanitàris e per tant era sua concepcion en forma de hilats complemetaris que garantizen diferents nivèus de cobertura e prestacion. E maugrat eth supòsit qu’aguesti principis an estat contempladi enes següents acòrs que se sotsmeten a votacion, entenem qu’a mancat era substanciau informacion as auti membres deth Conselh Generau d’Aran, atau com as collectius de metges e personau sanitari d’Aran, e qu’era recerca d’un acòrd d’unanimitat, ath nòste enténer, fòrça important per tractar-se d’un ahèr com era sanitat, auesse meritat ua informacion técnica mès precisa e dialogada.
Ei per aguest motiu qu’ eth vòt des grops representadi serà d’abstencion ad aguesti dus punts, ara demora de conéisher damb mès detalh era pregondidat des reformes que supausen aguesti acòrds, atau com es critèris de foncionament des naues estructures creades.