Eth nòste projècte ei Aran. Aran ès tu

Unitat d’Aran inste ar Ajuntament de Vielha a priorizar era creacion d’ua estacion en Tuca peth dessús deth projècte urbanistic

Unitat d’Aran inste ar Ajuntament a que complisque damb eth convèni marc en tot preservar era creacion d’ua estacion de montanha peth dessús dera urbanizacion der airau, atau coma li recomane era madeisha Comission d’Urbanisme. UA demane incorporar es directritzes d’Urbanisme damb er objectiu de “garantir qu’es inversions en infraestructures e equipaments se hèsquen damb antelacion ath desvolopament dera urbanizacion a pè de pistes”.

Eth grop d’UA repròve era prepausa der Ajuntament de Vielha e Mijaran peth sòn caractèr mès especulatiu que d’oportunitat sociau e economica entath municipi, pr’amor que considère qu’eth projècte aurie de “delimitar resèrves entà equipaments e infraestructures, plantejar un modèl urban integrat, qu’esvite era desocupacion temporau e favorisque er abitatge protegit, e garantir era mobilitat e era sostenibilitat tant economica coma ambientau”. Requisits toti eri qu’era actuau prepausa deth Govèrn municipau non contemple en tot incomplir damb era concepcion damb era que neishec eth projècte de redubertura.