Document programatic d’Unitat d’Aran.

Unitat d’Aran se considère un partit progressista, aranesista e de clares conviccions ena defensa des drets nacionaus d’Aran, atau coma ena afirmacion dera sua cultura pròpia e deth sòn estatus politic diferenciat en Catalonha.
En aguest sentit, Unitat d’Aran trebalharà en apregondiment deth procès autonomic aranés.

Unitat d’Aran ei tanben un partit municipalista que considère es municipis part fondamentau dera division administrativa deth nòste país, en tot entené-les coma pèces claus deth procès de descentralizacion dera administracion autonomica e estatau.

Es objectius politics d’Unitat d’Aran son basadi ena volentat d’arténher ua societat mès justa e igualitària que permete er accès de toti es individus as drets basics tà ua vida digna, ei a díder, dera educacion, dera sanitat publica e dera igualtat d’oportunitats, sense qu’era apertienença a ua classe sociau determinada, n’era manca de recorsi economics sigue motiu de discriminacion sociau.

Superat eth moment istoric de negociacion e aprobacion dera “Lei d’Aran”, Unitat d’Aran a iniciat un nau procès d’impuls d’iniciatives politiques non estrictament vinculades ara reïvindicacion nacionau, per enténer qu’eth procès constituent ei dejà iniciat, maugrat era tebesa damb qué lo desvolope eth partit governant, Convergéncia Democratica Aranesa.
Unitat d’Aran cercarà un posicionament politic que li permete actuar enes ambits sociaus, economics, mieiambientaus e ath madeish temps, de mantier ua postura actiua en prorocès de desvolopament e aplicacion dera Lei d’Aran.
Unitat d’Aran vetlharà tanben per un desvolopament racionau deth nòste territòri, tot susvelhant qu’eth procès de repartiment de riquesa sigue çò mès democratic possible.
Era conviccion e era volentat de participar ena construccion d’un projècte de progrès tà Catalonha an hèt que, dempús 1990, Unitat d’Aran e eth PSC agen convergit en un projècte comun qu’ a cristalizat ena formacion de listes conjuntes enes eleccions municipaus de 1999 damb ua formula de coalicion de partits.
Ei volentat d’aguest partit continuar aguesta collaboracion, segontes demore reflectit en anèx d’aguest document qu’establís eth marc de relacion damb eth Partit dels Socialistes de Catalunya.

Unitat d’Aran ratifique atau era sua voluntat de mantier un perfil polític pròpi que concrète era diferència d’un territòri damb cultura, lengua e identitat pròpia se ben aguesta organitsacion vò huger d’un localisme endogamic que l’impedisque participar ena vida política catalana, espanhola o europea. E ei en aguest sentit, que en darrèr congrés d’aguest mileni, Unitat d’Aran s’aprèste a iniciar ua etapa de decidida contribucion enes objectius adés senhaladi que mos han de permeter era construccion d’un Aran e d’ua Catalunha més justa e progresista.

Aran 6/11/99