Er alcalde de Bossòst e candidat ara reeleccion per Unitat d’Aran, Paco Rodríguez Miranda, a dat a conéisher ath sòn equip entà governar eth pòble pendent es pròplèu 4 ans, se recep era confidança des vesins e es vesies. “Ei un equip preparat, illusionat e equilibrat, entre era experiéncia d’uns e era joenessa d’uns auti, toti damb ganes de trabalhar peth pòble”, atau coma a declarat.
Ar equip der alcalde s’incorpòren Amador Marqués (26 ans), cap de Gabinet e Comunicacion deth Govèrn aranés e candidat numero 2 per Quate Lòcs entath Conselh; Àlex Peiró (21 ans), estudiant e jogador dera Union Esportiva de Bossòst; e Emilio José Fernando, arquitècte tecnic.
Era gestion d’UA ath capdauant der Ajuntament a permetut bastir un nau pònt, mielhorar carrèrs, renauir eth sistèma d’enlumenatge public e d’aigües, entre d’autes actuacions plan importantes e demorades peth pòble. “Aguesti hèts avalen era nòsta gestion e era nòsta propòsta de futur a favor de toti es vesins”, segontes Paco R. Miranda.
En pròplèu mandat, er alcaldable vò bastir ua naua escòla mairau, condicionar era zòna esportiva, crear ua centrau de biomassa entà generar naui lòcs de trabalh e hèr a arribar er hilat de gas entà tota era populacion, ath delà de d’autes propòstes que sajaràn de dar continuïtat ara òbra d’UA a favor d’un Bossòst renauit e ara nautada de çò que se meriten es sòns vesins e vesies.
Era candidatura
- Francisco Rodríguez Miranda
- Amador Marqués Atés
- Maria Ángeles Medan Noguera
- Alex Peiró Moga
- Emilio José Fernando Gil
- Jesús Folgar Janeiro
- Ignacio Gómez Pérez
- Maria Cristina Almansa Artiga
- Maria Isabel Moga Muñoz
Suplents
- Mercedes Guri Llaveria
- David Cano Morillas