UA prebotge un Espaci dera Vianda entà potenciar era Escòla d’Ostalaria de Les

Eth sindic d’Aran e candidat ara reelecion, Paco Boya, e eth conselhèr de Miei Ambient e candidat per Pujòlo, Paco Bruna, an dat a conéisher aué era sua propòsta entà crear en Aran un Espaci dera Vianda, qu’impulsarie ath viatge ara Escòla d’Ostalaria de Les. Aguest centre compdarie damb un airau d’interpretacion dera carn, ua aula gastronomica e un talhèr de degustacions.

Er objectiu d’aguest espaci ei contribusir ath coneishement e era gastronomia des productes de nauta montanha, en tot méter en valor es productes agroalimentaris autoctòns, coma es restacadi dirèctament damb er carn, mès tanben d’auti de fòrça identificatius coma er hormatge, era mèu, eth patè, era òlha aranesa o eth caviar. Eth Conselh a artenhut en aguesta legislatura eth reconeishement dera Mèrca de Garantia Val d’Aran entad aguest tipe de productes, que, ath delà, dan valor hijut ara destinacion toristica.

Entà Paco Boya, “era Escòla d’Ostalaria de Les aurie de jogar un papèr clau en aguest Espaci dera Vianda coma centre de referéncia en encastre gastronomic e formatiu”. Damb aguest espaci, “volem potenciar era codina de montanha, fomentar eth coneishement des activitats restacades damb era ramaderia, contribuir a ua vida saludabla, balhar formacion atau coma experiéncies de degustacion e difóner eth procès d’obtencion dera matèria prumèra, producccion, restauracion e consum”, a explicat Paco Bruna.

Eth sindic Paco Boya a assegurat que “era Val d’Aran compde amb ua ofèrta gastronomica de naut valor qu’auem de potenciar coma un atractiu deth territòri entà tot er an”. Entad aquerò, “mos cau un espaci de referéncia que prebotje era formacion e era investigacion ar entorn des nòsti productes e les dongue a conéisher ath gran public”.

Damb era cession dera bastissa adjunhuda ara residéncia de Les, eth projècte poderie amiar-se a tèrme damb era implicacion deth Conselh Generau, es departaments d’Agricultura e Ensenhament e eth pròpri Ajuntament de Les. De hèt, eth sindic ja a iniciat convèrses damb eth Govèrn dera Generalitat entà desvolopar-lo.

Leyendo comentarios Facebook...
Loading Disqus Comments ...

You must fill in your Livefyre SiteID in the Comments Evolved plugin options.

No Trackbacks.