Planvoludi e planvoludes,
Me platz hèr-vos arribar aguesta carta tà informar-vos sus es ahèrs subergessents dera vida politica deth nòste país e ath temps, poder compartir bèra reflexion damb vosati e vosates. Aguest ei un exercici qu’ auram de hèr mès soent, pr’amor que des d’UA èm conscients dera dificultat d’establir pònts de comunicacion eficaci damb toti e totes. Viuem moments enes qué er excès de comunicacion, e era dificultat de catalogar-la, s’a convertit en un autentic problèma. Atau donc era accion deth tu a tu, dera paraula, torne a èster essenciau.
Dit açò, voi tanben convidar-vos e animar-vos a préner part e participar activament enes trobades deth partit, ja sigue ena executiva o per suposat enes assemblades, pr’amor qu’era vòsta implicacion ei essenciau tà per’mor de somar opinions e punts d’enguarda en un moment complicat dera vida politica. Actuaument auem diuèrsi fronts dauridi, toti eri importants. Eth prumèr, tot e que mediaticament non age pro resson, son es grèus problèmes sociaus derivadi dera crisi e que mos cau seguir atentament, pr’amor que mos an de motivar tà préner consciéncia deth besonh de capvirar es
politiques que carguen sus es mès febles es còsti dera crisi.
En dusau lòc, eth conflicte politic qu’aué se debatís en Catalonha sus eth dret a decidir. Un dret que respectam e que volem sigue conseqüent damb era realitat aranesa. E ei en aguest sens qu’auem amiat accions en Conselh Generau. Accions sense èxit peth refús de CDA, que non reconeish eth dret des aranesi a decidir eth sòn futur. Ei evidenta era incongruéncia de CDA, pr’amor que demòstre qu’enes moments clau tath nòste país, tostemp priorizen es interèsi de partit per dessús des deth país. Ac comprobam tanben, damb eth vòt en contra deth deputat Alex Moga en Parlament
de Catalolnha ara demana d’ajuts pes riuades, prèviament aprovadi peth Plen deth Conselh Generau d’Aran, en tot demostrar que non an cap d’empach en votar causes diferentes en Aran e en Barcelona. E per se non èren pro aguesti dus exemples, era naua Lei de Govèrns Locaus dera Generalitat de Catalonha, dèishe a Aran en ua posicion ben delicada respècte dera naua division des vegueries, tant denostada per CIU e qu’ara s’aprèsten a hèr realitat.
Son ahèrs sus es que mos cau trabalhar de valent en un temps de fòrça dificultat tath desvolopament dera activitat politica, e ei justament tà superar aguesta dificultat que mos cau, mès que jamès, er esfòrç e er alend de toti e totes es que hètz possible qu’aguesta organizacion seguisque viua e volgue tornar a governar tà deféner era dignitat deth nòste pòble e era qualitat de vida des vesins e vesies d’Aran.
Ben coraument
Paco Boya
Secretari Generau
Aran, noveme de 2013