Unitat d’Aran demane era convocatòria d’un plen extraordinari tà debàter e avalorar es 25 ans deth Conselh Generau d’Aran

Eth partit aranés a instat a realizar un Plen Extraordinari dera maxima institucion aranesa tà avalorar es 25 ans dera reinstauracion deth Conselh Generau que se celèbren enguan, e tà debàter e plantejar es rèptes e objectius des pròplèu annades deth govèrn d’Aran.

Eth 17 de junh d’enguan se celèbren es vint e cinc ans dera reinstauracion deth Conselh Generau d’Aran, eth quau se recuperèc en junh de 1991.

Enquia aqueth moment, era volentat d’Aran d’exercir er autogovèrn e era gestion des ahèrs publics auie demorat clarament evidenciada quan, eth 26 de junhsèga de 1979, damb era democràcia recent estreada, toti es alcaldes aranesi s’amassèren ena glèisa de Cap d’Aran, tà crear era Comission Gestora Intermunicipau tara Reinstauracion des Institucions araneses. Eth 2 de seteme de 1979, ena  madeisha glèisa, demorèc constituït eth Conselh Generau Provisionau d’Aran.

Passat aguest temps, UA considère qu’a arribat eth moment tà hèr un balanç de çò qu’an significat aguesti 25 ans. Francés Boya, Conselhèr pòrtaveu d’UA, manifestaue que “es rèptes ena gestion dera sanitat, benèster e educacion miaçadi pes retalhades, o eth futur tàs joeni en un contèxte de precarietat e de dificultats laboraus, son elements sus es quaus Unitat d’Aran considère qu’era politica aranesa a de reflexionar e acordar proposicions  tà gestionar eth melhor pervier possible tara ciutadania d’Aran”. Atau madeish, Boya tanben a insistit en que “ahèrs coma era situacion dera lengua e deth sòn devier, o eth futur de elements com eth paisatge, es activitats agràries e ramadères e es efèctes que provòquen sus activitats economiques coma eth torisme, an d’èster abordadi damb urgéncia”.

Aran, 4 de mai de 2016

Leyendo comentarios Facebook...
Loading Disqus Comments ...

You must fill in your Livefyre SiteID in the Comments Evolved plugin options.

No Trackbacks.