Unitat d’Aran vòte en contra de incorporar as pompièrs volentaris en ua empresa mercantila

UA, que ja se abstenguec ena prepausa iniciau dera reforma deth modèu des pompièrs volentaris, a votat en contra ena aprovacion finau en darrèr plen deth Conselh Generau d’Aran.

Ena legislatura 2007/2011 se creèc era Entitat Publica Empresariau de  Pompièrs d’Aran tà desvolupar un modèu integrau de prestacion de servicis d’Emergències. Aquest modèu siguec desestimat peth govèrn de Convergència ena següenta legislatura. E eth passat dia 18 d’hereuèr se portèc ath Plen era aprovacion iniciau d’ua naua reforma, ena quau se incorporaue as pompièrs volentaris d’Aran en ua empresa mercantila.

En passat plen deth deluns dia 25 de mai, se portèc a votacion era aprobacion finau de dita reforma. Francés Boya, manifestèc que “non se pòt aprovar ua reforma d’aguestes caracteristiques, sense debater e sense cap tipe d’explicacion prèvia. Auem auut sonque ua reunion d’urgència eth diuèndres dia 15 d’hereuèr”.

Eth Conselhèr pòrtaveu d’UA declarèc que “deuant dera actitud de manca de volentat de diàleg e, perque consideram qu’es pompièrs volentaris son un patrimòni de toti e que formen part dera identitat aranesa, creiguem qu’an d’èster preservats. S’a de fomentar era participacion e incorporacion des joeni en aguest collectiu”.

Unitat d’Aran considère qu’era integracion d’aguest collectiu en ua estructura mercantil ei pòc adequada tà ua organisacion de volentaris, qu’a d’èster estructurada en base a principis de gestion deth voluntariat e non des interèsi mercantils d’un conselh de direccion. “Aguesta reforma ei unicament ua simplificacion des estructures a còsta de relegar as pompièrs a un papèr subsidiari en ua empresa mercantil, que pòt, en un futur, incorporar capital privat e pertant, acabar estant un servici privatitzat”, apunte Boya. “Es pompièrs volentaris sonque aparèishen en article 17 des Estatuts tà díder que, “eth Conselh d’Administracion amiarà a tèrme era sua integracion” sense especificar cap condicion respècte dera integracion des volentaris ena estructura professionau de TESVA. Er anterior EPE incorporaue as comandaments de pompièrs, trigadi democraticament en Conselh de Direccion e creaue era “taula des volentaris” tà abordar e estimular era participacion des pompièrs en conjunt”, contunhe dident.

Unitat d’Aran considère qu’era incorporacion deth personal laboral nomenat com “de manteniment” ena empresa Tesva, non pòt èster considerat com un cambi de modèu, se non com ua simplificacion que perjudicarà ara recuperacion deth voluntariat.

Boya afirme que “en Unitat d’Aran lamentam era manca de volentat de dialòg deth Síndic Barrera, atau com es sues declaracions e atacs personaus en es nòtes de prensa deth Conselh as grops e portaveus qu’exprèssen d’autes opinions”.

 

Aran, 12 de mai de 2016

Leyendo comentarios Facebook...
Loading Disqus Comments ...

You must fill in your Livefyre SiteID in the Comments Evolved plugin options.

No Trackbacks.