Boya artenh era collaboracion dera Deputacion de Lleida tà reconstruïr era passarèla de Les

Eth plen dera Deputacion a aprovat aué un convèni damb er Ajuntament de Les tara reparacion dera passarèla deth pònt de Les, destruïda pendent es aiguats de 2013

Eth deputat aranés Paco Boya a artenhut qu’era Deputacion de Lleida collabòre ena reconstruccion dera passarèla qu’era Garona s’emportèc en Les eth 18 de junh de 2013.

Dempús de diuèrses convèrses e negociacions, aué s’aprovaue ena Deputacion eth convèni entre aguesta institucion e er Ajuntament de Les peth qu’era Deputacion de Lleida apòrte 160.000€ tara reconstruccion dera passarèla atau coma es trabalhs de redaccion deth projècte e peth qu’er Ajuntament de Les serà eth responsable dera licitacion e execucion des òbres, qu’an un pressupòst d’execucion per contrata de 241.163’16€.

Aguest convèni inclodís tanben eth traspàs deth pònt de Les (LV-5058), que passe a èster titularitat der Ajuntament de Les pr’amor qu’enquia ara n’ère era pròpria Deputacion.

Segontes manifestaue Boya “ei un moment fòrça important pr’amor que, dempús de mès de dus ans, s’a podut finaument desencalhar aguest ahèr e perméter que Les recupère ua insfraestructura coma era passarèla, plaçada en centre deth pòble”.

Ath madeish temps Boya mostraue era sua satisfaccion per acòrd artenhut e soslinhaue era “bona predisposicion dera Deputacion de Lleida entà ajudar a resòler, ena mesura de çò possible, es dificultats des municipis aranesi”.

Ei previst qu’es òbres comencen eth pròplèu mes de seteme.

Leyendo comentarios Facebook...
Loading Disqus Comments ...

You must fill in your Livefyre SiteID in the Comments Evolved plugin options.

No Trackbacks.