Unitat d’Aran reclame era finalizacion des òbres pendentes en Institut d’Aran
Eth grup d’UA en Conselh Generau d’Aran a presentat ua mocion tà demanar ara Generalitat de Catalunya er acabament dera tresaua fasa des òbres der Institut qu’encara demore pendenta d’executar
En 2009 eth govèrn dera Generalitat presidit per José Montilla aprovèc eth projècte de reforma e reabilitacion der edifici der Institut d’Aran. Aguest projecte consistie ena reconstruccion e melhora interiora deth centre e ena reabilitacion der espaci exterior, tamb eth bastiment d’un espaci cubèrt multifuncionau. “Es dues prumères fases se portèren dejà a tèrme e se finalizèren en 2010. Totun, dempús de 6 ans, encara manque per finalizar era tresau fasa”, explique Francés Boya, conselhèr portaveu d’UA.
Entà poder amiar a tèrme aguesta òbra, resulte de besonh era demolicion des antics barracons installadi en pati der Institut, causa que facilitarie era ampliacion d’espaci e, atau e coma eth pròpri centre a sollicitat, era creacion d’aumens ua sala multifuncionau que permete realizar activitats esportives en madeish centre. “Er Institut d’Aran ei era unica infrastructura d’educacion segondària en Aran, e creiguem qu’ei plan important qu’age ues instalacions adecuades”, remèrque Boya.
Unitat d’Aran a presentat aguesta mocion entà instar ath Departament d’Ensenhament dera Generalitat de Catalunya, a que des·hèigue es antics barracons, que son tanben un risc tara seguretat, e a que finalize era reforma der espaci exterior. “Pensam qu’ei essenciau entà poder melhorar era qualitat dera formacion e benèster tant d’alumnes coma professorat”, higie eth Conselhèr Pòrtaveu d’UA.
Aran, 6 de seteme de 2016