Unitat d’Aran critique durament es darrèri procediments de contractacion realizadi peth Conselh Generau d’Aran

Enes darrères setmanes eth Conselh Generau a trèt a concors es servicis de comunicacion dera institucion e ua plaça d’assessor en matèria de cultura e patrimòni, sense exigir estudis omologadi n’era titolacion requerida d’aranés.

Aguest maitin s’a amiat a tèrme eth darrèr plen der an deth Conselh Generau d’Aran. En apartat de precs e demanes Paco Boya, conselhèr portaveu deth grop Unitat d’Aran, a criticat durament es dus darrèri procèssi de contractacion qu’a amiat a tèrme eth Conselh Generau d’Aran. Eth prumèr d’eri a estat era aufèrta entà curbir es servicis de comunicacion deth pròpri Conselh. Eth plec de condicions d’aguest concors non a contemplat era obligacion d’èster en possession deth nivèu C d’aranés, ne tanpòc era obligatorietat d’ua titolacion especifica. “Resulte incomprensible que qui vage a desvolopar era accion comunicativa e informativa deth Conselh Generau d’Aran non age es coneishements d’aranés de besonh que mèrque era lei”, a manifestat Boya. E a hijut que “aguest hèt sonque demòstre era manca de compromís d’aguest govèrn tamb era nòsta lengua, e met en dubte eth prestigi dera institucion”.

Eth dusau procès que s’a criticat en aguest plen a estat eth dera plaça d’assessor culturau e de patrimòni ena que tanpòc s’a exigit cap titolacion ne d’aranés, ne de cap aute tipe. En aguest sens, Boya a dit que “grana part des foncions que s’atribuïssen ad aguesta plaça ja aurien d’èster desvolopades pera pròpria Acadèmia dera Lengua. Per tant, per un costat se financie un nau lòc de trabalh, e per aute ara pròpria Academia entà hèr es madeishes funcions”.

UA a demanat tanben en aguest plen qu’eth Conselh prene mesures entà protegir eth patrimòni culturau des tors e castèths d’Aran, e que s’amie entà deuant un estudi socio sanitari entà conéisher era situacion actuau des persones granes e/o depenentes deth nòste país.

Aran, 20 de deseme de 2016

Leyendo comentarios Facebook...
Loading Disqus Comments ...

You must fill in your Livefyre SiteID in the Comments Evolved plugin options.

No Trackbacks.