UA reclame mesures urgentes en favor deth sector ramadèr aranés

Dempús des darrèri atacs der os ath bestiar ena Val d’Aran, Unitat d’Aran a presentat ua mocion en plen deth Conselh Generau d’Aran tà reclamar as administracions publiques qu’actuen tamb celeritat  entà possar mesures de proteccion as ramats.

Pendent aguest an s’an produsit reiteradi atacs d’ossi qu’an auut coma conseqüéncia era desparicion de dues ègües, un potre, un quinzenat de oelhes e dus eishames d’abelhes. Aguestes mòrts s’an de somar as ja patides desde era implantacion deth programa LIFE tamb era reintroduccion der os en 1996. Chifra que s’elève a mès de 290 atacs des d’alavetz.

Aguesti atacs agrèugen era dificil situacion en que se tròbe dejà eth sector ramadèr e era pagesia aranesa, que cada viatge compde tamb mens ajudes publiques e mès exigéncies burocratiques. Eth Conselhèr pòrtaveu d’UA, Francés Boya manifestaue que, “enes darrèri tempsi era nòsta pagesia a patit grèus retalhades e retrassi en crubament des ajudes, atau coma ua desatencion endemica des agricultures de montanha”.

Es ramadèrs aranesi an criticat durament era reintroduccion d’aguesta espècia predadora des deth inici deth programa LIFE, e remèrquen que s’a hèt sense concens tamb eth sector. “Aguesti atacs comprometen era existéncia deth sector. Cau potenciar es politiques de supòrt ath grèmi, en tot aumentar e facilitar es pagaments pes danhs. Non se pòt contunhar gestionant eth territòri des d’ua perspectiua urbana”, higie Boya.

Era mocion presentada per Unitat d’Aran demane tanben que se revisen es protocòus de proteccion as ramats, atau coma evitar era possible reintroduccion de d’autes espècies predadores sense garantir mesures avientes ne consens tamb totes aqueres organizacions que se poguen veir afectadi.

Aran, 29 de junh de 2017

Leyendo comentarios Facebook...
Loading Disqus Comments ...

You must fill in your Livefyre SiteID in the Comments Evolved plugin options.

No Trackbacks.