POSICIONAMENT DERA ASSEMBLADA D’UNITAT D’ARAN DAUANT DER ANONCI DE REFERÈNDUM INDEPENDENTISTA DER 1 D’OCTOBRE

UNITAT D’ARAN-PARTIT NACIONALISTA ARANÉS se definís coma un partit aranesista e municipalista. UA-PNA ei un esturment entà melhorar era vida des vesins e vesies des pòbles e municipis dera Val d’Aran e entà deféner er autogovèrn d’Aran e era sua identitat e singularitat culturau, politica, lingüistica e institucionau, jos es principis dera justícia sociau e era prosperitat economica entà toti e totes es aranesi e araneses.

Ei per açò que, dauant d’un nau anonci d’un possible referèndum d’independéncia de Catalonha, per part deth president dera Generalitat, era militància d’UA-PNA amassada en Assemblada reitère era sua volentat de hèr a respectar era veu pròpria d’Aran, eth dret a decidir des ciutadans aranesi, en marc legau que mos empare. Era identitat d’Aran se fonamente ena soma e era apertiença a diuèrsi encastres culturaus e administratius. Ath madeish temps, UA-PNA met de manifèst eth mensprètz qu’eth govèrn dera Generalitat a agut envèrs Aran e era sua singularitat pendent tot aguest procès. Per açò, UA-PNA se posicione a favor dera majoria sociau aranesa que vò somar, que non vò renonciar ne a Catalonha ne ara rèsta d’Espanha, e qu’ac vò hèr per miei dera unica via possibla en democràcia: eth dialòg, eth pacte e eth respècte ar Estat de dret.

Atau madeish, UA-PNA demane as govèrns dera Generalitat e der Estat que dialògen e trabalhen entà resòlver es problèmes sociaus, economics e ambientaus de Catalonha e ac hèsquen damb respècte e reconeishement ara sua istòria e ara sua identitat culturau e lingüistica, e ac hèsquen tanben en tot tier en compde qu’era Val d’Aran forme ua realitat nacionau diferenciada, qu’a de besonh un mielhor finançament entar exercici des sues competéncies e ua apòsta clara e efectiva entà desvolopar politiques de promocion sociau der aranés, lengua pròpria d’Aran. Aguesta ei era nòsta prioritat e era nòsta rason d’èster.

Era Assemblada de Militants, amassada en session extraordinària, en Vielha, eth dia 7 de junhsèga de 2017.

Leyendo comentarios Facebook...
Loading Disqus Comments ...

You must fill in your Livefyre SiteID in the Comments Evolved plugin options.

No Trackbacks.