Unitat d’Aran lamente prigondament es eveniments deth dia d’aué e es imatges de violéncia contra es persones que s’an mobilizat tà anar a votar. Cap de rason justifique aguesta situacion e cap d’argument politic pòt auer com expresion n’era violéncia n’eth limit ara manifestacion d’expressions collectives. Hèr a créisher ua espiral de confrontacion non comportarà mès que patiment e ua situacion de grèu perjudici tàs ciutadans e ciutadanes. Sonque era serenitat e era voluntat fèrma de trobar solucions dialogades e pactades pòt recondusir aguesta situacion. Volem, des deth respècte a totes es posicions, cridar as govèrns dera Generalitat e der Estat Espanhòl a cercar ua solucion pactada que permete, per miei der exercici democratic, ua solucion tà garantir un ben tant preuat com ei era conviuença e es drets fonamentaus de toti es ciutadans.
Aran, 1 d’octubre de 2017