Unitat d’Aran – Partit Nacionalista Aranés complís aué 30 ans d’existéncia, donques eth 2 de hereuèr de 1980 eth partit s’inscriuie en registre oficiau deth Ministèri d’Interior. Eth president Arturo Calbetó a reivindicat eth legat d’UA en tot soslinhar qu’aguest “ei un partit istoric, mès, sustot, un partit cargat de futur”. En aguest nau periòde, “UA s’erigís coma eth clar defensor des drets politics d’Aran e des drets sociaus des ciutadans que demoren en Aran”.

Arturo Calbetó s’a referit ar hèt que “UA entestèc, hè trenta ans, es aspiracions deth pòble aranés, e aué ac torne a hèr ath capdauant dera maxima institucion d’autogovèrn entà preservar era sua singularitat politica, identitària e territoriau laguens de Catalonha e Espanha”. Tath president, UA ei eth partit dera majoria de ciutadans d’Aran e, per aguest motiu, se met ath sòn costat en uns moments de dificultats e rèptes plan importants entath devier coma pòble damb consciéncia clara dera sua singularitat.

Unitat d’Aran premanís ua sèrie d’actes e celebracions pendent tot er an 2010 entà reivindicar es valors e eth projècte de país que defen, atau coma entà daurir eth partit ath conjunt dera societat a compdar dera participacion e era transversalitat des sues propòstes. “Èm eth partit dera majoria, e damb era majoria des persones i volem compdar entà arténher un país mès auançat sociau e economicament e mès fòrt des deth punt d’enguarda der autogovèrn”, segontes Calbetó.