Eth secretari generau d’Unitat d’Aran, Francés Boya, e eth president deth partit, Arturo Calbetó, an participat aué en acte de celebracion qu’UA a premanit entà hestejar eth Dia d’Euròpa, amassa damb eth prumèr secretari deth Partit Socialista de Nauta Garona, Sébastien Denard, eth deputat europèu, Kader Arif, e eth senador Bertrand Auban.

Damb aguest motiu, a agut lòc, en Ajuntament de Les, ua trobada transtermierèra entre militants e simpatizants d’UA e deth Partit Socialista dera Federacion de Nauta Garona. Unitat d’Aran arrefortís atau eth sòn compromís de vocacion europeista, atau coma es sòns laci d’amistat damb es fòrces de progrès e, en especiau, damb eth Partit Socialista Europèu e eth PS de Nauta Garona.