Era assemblada extraordinària de militants d’Unitat d’Aran a ratificat er acòrd deth Govèrn dera Generalitat entà excludir Aran dera organizacion vegueriau, en ua amassada qu’a agut lòc delànet ena sedença deth partit. Era assemblada a servit entà consolidar era relacion d’UA damb eth PSC, dempús d’auer complit aguest damb eth compromís entà respectar era singularitat dera Val d’Aran en debat territoriau.

Eth sindic d’Aran e secretari generau d’Unitat d’Aran, Francés Boya, e eth president d’UA, Arturo Calbetó, an mostrat era sua satisfaccion per acòrd artenhut damb eth PSC entà esmendar era norma. “Auem capvirat era lei de vegueries”, segontes Boya. Eth secretari generau a assegurat as militants que “dempús d’ua longa e dificila negociacion, Unitat d’Aran a guanhat prestigi en PSC”.

Francés Boya a advocat pera “unitat des aranesi enes ahèrs de país” e a lamentat que Convergéncia “non s’age volut híger ath consens entà excludir Aran des vegueries, coma reclamaue era màger part dera societat”. Totun, “se CDA governèsse, Aran formarie part dera vegueria deth Pirenèu”, pr’amor qu’era esmenda presentada per CiU ère “insufisenta e pòc ambiciosa” entàs aspiracions deth pòble aranés.