Hè dejà trenta ans. Ère eth 2 de hereuèr de 1980 quan se signèc en Vilassar de Mar era escriptura fondacionau d’Unitat d’Aran, e ja en seteme, artenhèrem era sua inscripcion en registre de partits politics deth ministèri der Interior. Encara son vigentes es linhes programatiques qu’eth partit publiquèc tan lèu comencèc a caminar. Encara mos pòden servir entà mesurar eth nòste grad actuau de fidelitat as madeishes. Unitat d’Aran a volut tostemp “arténher entà Aran era maxima autonomia possibla entà mantier e assolidar era nòsta identitat de pòble”. “Recuperar es institucions de govèrn” qu’a estat er objectiu primordiau deth partit d’ençà deth sòn naishement. Tanben auem volut “trabalhar pera normalizacion der aranés e prebotjar era personalitat culturau d’Aran”.

Eth sindic d’Aran e secretari generau d’Unitat d’Aran, Francés Boya, a arrefortit aué de forma solemna eth sòn compromís damb era Val d’Aran e, atau coma a anonciat dejà en diuèrses ocasions, a reiterat era sua volentat de deishar eth Parlament de Catalonha entà dedicar-se de forma exclusiva ara sindicatura d’Aran. Boya a hèt un balanç plan satisfactòri deth sòn servici a Aran coma sindic e, ath còp, deputat deth Parlament, atau coma demòstre era sua accion de govèrn en Conselh Generau d’Aran pendent aguesti tres ans de compatibilitat d’andús cargues, caracterizada pera bona entenuda e era collaboracion fructifèra damb era Generalitat.