Dempús des diuèrses afirmacions e comunicats emetudi peth grup politic “Amassa” des deth grup municipau d’UA en Vielha e Mijaran mos vedem ena obligacion de declarar çò que seguís:
- “Amassa” acuse ar equip de govèrn de Vielha e Mijaran d’amagar era bandera catalana deth balcon deth consistòri, hèt totaument faus. Era explicacion balhada per Ajuntament, que se tracte der efècte deth vent, non ei acceptabla entà “Amassa”, que s’estime mès daurir ua guèrra de simbèus, populista e demagòga. Ua guèrra ena que Unitat d’Aran non entrarà. Totun auesse estat interessant qu’Amassa mostrèsse era madeisha beligerància quan interessadament despareishen bandères de determinadi espacis en foncion der interés partidista o que critiquèsse tanben ad aqueri ajuntaments que non an toti es drapèus oficiaus en sòn balcon. Unitat d’Aran respècte toti es drapèus oficiaus e toti es sentiments des ciutadans que s’i senten restacadi.
- “Amassa” critique e met en qüestion eth sòu de membres der equip de govèrn municipau. Un sòu que respon ara reestructuracion deth pròpri equip aguesta legislatura, e ath trabalh qu’aguest a d’amiar a tèrme pendent aguesti pròplèu quate ans. Trabalh qu’ei destinat unica e exclusivament ath desvolopament economic e sociau deth municipi de Vielha e Mijaran. En aguest sens, lamentam qu’Amassa non s’aplique eth madeish mesurador de morau e transparéncia que reclame entàs auti. Des d’Unitat d’Aran consideram qu’aqueres persones que se dediquen ara politica an dret a guanhar-se era vida dignament, e es sòus plubics an d’auer totau e absoluta transparéncia, tanben tad aqueri cargues politics d’Amassa que cruben eth sòn salari der erari public.
- Des d’Unitat d’Aran governam institucions dubèrtes e ath servici des persones, pr’amor qu’atau ac a volut era ciutadania de forma clara. Non comprenem era actitut d’Amassa, que jos eth nòste punt de vista a un problèma de percepcion dera realitat e de desconeishement absolut deth país e dera administracion. Es sòns talents de provocacion constanta, superioritat morau, e inclús, d’insults gratuïts enes hilats sociaus des sòns membres, sonque demòstren manca de maduresa politica, sustot quan, a dia d’aué encara ac an tot per demostrar.
Des d’UA seguiram trabalhant per Aran e era sua gent, des deth respècte e era volontat de hèr deth nòste país un territòri desvolopat, just sociaument e damb identitat pròpria.